Løgtingið hevur samtykt leigustuðul

Stórur meiriluti av løgtinginum hevur samtykt lógaruppskotið um leigustuðul.

Eftir 2.viðgerð í gjár varð uppskotið samtykt við 27 atkvøðum fyri og einari ímóti.

Við lógaruppskotinum kunnu tey, sum búgva til leigu, fáa upp til 20 prosent av húsaleiguni afturrindað sum stuðul úr landskassanum. Tó í mesta lagi 1500 krónur um mánaðin.

Húski við einum fólki yvir 18 ár, sum tjenar í mesta lagi 350.000 krónur, fær fullan leigustuðul. Er inntøkan størri enn 350.000 krónur, lækkar leigustuðulin við fimm prosentum av inntøkuni, sum er oman fyri 350.000 krónur.

Eru tvey fólk yvir 18 ár í húskinum, so hava tey rætt til fullan leigustuðul - 1500 krónur um mánaðin - um samlaða inntøkan hjá teimum er minni enn 500.000 krónur. Er inntøkan størri enn 500.000 krónur, so lækkar leigustuðulin eftir sama leisti - nevniliga við fimm prosentum av inntøkuni oman fyri 500.000 krónur.

Hjá húski við einum fólki yvir 18 ár fellur leigustuðulin heilt burtur, tá inntøkan fer upp um 638.000 krónur.

Og hjá húski við tveimum fólkum yvir 18 ár fellur stuðulin burtur, tá samlaða inntøkan fer upp um 788.000 krónur.

Lógaruppskotið um leigustuðul kemur til 3.viðgerð í morgin, tá løgtingið eftir ætlan fer í summarfrí.

Verður lógaruppskotið samtykt, sum tað sær út ídag, fær tað gildi 1.september.

Almannaverkið skal umsita leigustuðulin, og fólk skulu søkja um stuðulin har.