Bretland og Pólland gjørt verjuavtalu

Bretland og Pólland hava skrivað undir verjuavtalu.

Tey bæði NATO-londini skrivaðu undir avtaluna á eini fyrrverandi hernaðarstøð í útjaðaranum av London í gjár.

- Eingin størri avbjóðing er fyri okkara lond enn avbjóðingin, sum russiski ágangurin hevur við sær, segði Starmer.

Pólski forsætisráðharrin, Donald Tusk, legði dent á týdningin av felags virðum sum fólkaræði, at varðveita rættarsamfelagið og mannarættindi.

Knýta verjuídnaðin saman

Endamálið við avtaluni er millum annað at knýta verjuídnaðin í Póllandi og Bretlandi tættari saman. Við í avtaluni eru eisini felags hernaðarvenjingar.

Bretland hevur áður gjørt líknandi avtalur við Frakland og Týskland.

Starmer og Tusk skrivaðu undir avtaluna sama dag, sum norski forsætisráðharrin, Jonas Gahr Støre, vitjaði í París. 

Har boðaði Støre frá, at Noreg fer undir tilgongdina at menna tættari samstarv um kjarnorkuvápn við Frakland, skrivar NTB.