Løgtingið liðugt í dag

Løgtingið fer at avgreiða seinastu málini, tað hevur fingið eftir løgtingsvalið, í dag.

Átta triðju viðgerðir eru á skránni hjá tinginum í dag.

Men fyrst eru ófráboðaðir fyrispurningar á skránni.

Ein skrivligur fyrispurningur er ikki svaraður.

Eirikur í Jákupsstovu, løgtingsmaður, spurdi Lene Moyell Johansen, ríkisumboð, átta spurningar um ymisk viðurskifti hjá løgregluni og ákæruvaldinum, millum annað um málið hjá Bakkafrosti.

Løgtingið spurdi 6. mai Lene Moyell Johansen, um og nær, fyrispurningurin verður svaraður. 

Á heimasíðu løgtingsins sæst ikki, at hon hevur svarað.

Ríkisumboðið ger sjálvt av, um tað svarar slíkum spurningum frá løgtinginum.

Tingfundur er klokkan tíggju.