Skúlastjórin á Heilsuskúlanum rópar varskó

Skúlastjórin á Heilsuskúla Føroya rópar nú varskó um trupulleikan at fáa starvsfólk til eldraøkið.

- Í Føroyum klára vit ikki at fylla ein flokk í Tórshavn, við ófaklærdum starvsfólkum innan eldraøkið, sum hava arbeitt í meira enn trý ár. Tað er fakta í løtuni, og tað burdi fingið politikkarar og onnur at sparra eyguni upp, skrivar Vivie Davidsen í lesarabrævi í gjár.

Skúlastjórin vísir á manglandi áhugan at útbúgva seg innan eldraøkið. 

Einans 14 søktu, tá Heilsuskúlin bjóðaði fólki at søkja til førleikamettan heilsuhjálpara fyri ófaklærd starvsfólk, við arbeiðsroyndum, á eldraøkinum.

- Tað er ivasamt, hvussu grundarlagið verður framyvir, tá vit ikki megna at fylla ein flokk við ófaklærdum fólki í høvuðstaðnum. Í veruleikanum avspeglar hendan myndin bara veruleikan á eldraøkinum í Føroyum í dag, og tað er mangul uppá starvsfólk, skrivar Vivie Davidsen, skúlastjóri.