Ætlar ikki at broyta FAS-skipanina

Íslendska Sjómannafelagið er í verkfalli og hevur lagt trý skip hjá Eimskip / Faroe Ship. Sjómannafelagið sigur seg stúra fyri, at íslendskir sjómenn verða uppsagdir, og bílig útlendsk arbeiðsmegi sett í staðin.

Í tíðindunum á middegi í gjár segði Jan Højgaard, formaður í føroyska Fiskimannafelagnum m.a., at tað er Føroya Altjóða Skipaskrá, FAS, sum er trupulleikin.

Jacob Vestergaard, landsstýrismaður við vinnumálum, hevur m.a. FAS-skipanina um hendi. Hann er samdur um, at skipanin loyvir manning sambært útlendskum sáttmálum.

Men hann er ikki samdur í, at nakað er galið við tí.

Vita ikki, hvat gongur fyri seg
Ein onnur atfinning frá formanninum í Fiskimannafelagnum er, at føroyingar einki vita um, hvat gongur fyri seg umborð á skipum, sum eru skrásett í FAS.

Landsstýrismaðurin sigur einki kenna til tað, men hann vísir til føroyska lóggávu og avvarandi myndugleika.

Ein triðja atfinning frá formanninum í FIskimannafelagnum er, at FAS-skipanin gongur út yvir umdømið hjá Føroyum.

Men heldur ikki tað kennur landsstýrismaðurin nakað til. 

Samanumtikið heldur Jacob Vestergaard, at FAS-skipanin virkar, og at hon skal halda fram sum nú.

Hoyr innslag úr tíðindunum