USA: Ísrael og Libanon samd um vápnahvíld

Ísrael og Libanon samdust í nátt um vápnahvíld, boðar amerikanska uttanríkisráðið frá.

Samráðingar undir amerikanskari leiðslu hava seinastu tíðina verið í Washington um kríggið í Miðeystri.

Partarnir siga, at teir binda seg til víðari samráðingar, og siga seg ongar fíggindasinnaðar ætlanir hava mótvegis hvør øðrum.

Vápnahvíldin kemur bert fáar tímar eftir, at ísraelsk álop í Suðurlibanon í gjár drupu í minsta lagi níggju fólk.

Hizbollah sigur seg eisini hava skotið rakettir inn í Ísrael. 

Drigið inn í kríggið

Libanon varð drigið inn í kríggið millum USA, Ísrael og Iran, eftir at Hisbollah skeyt rakettir móti Ísrael.

Álopið var hevnd fyri ísraelskt álop, sum drap ovasta leiðaran í Iran, Ali Khamenei.

Ísrael svaraði aftur við hørðum rakettálopum og innrás í Suðurlibanon.

Tað eydnaðist USA at fáa semju um eina avtalu um vápnahvíld millum londini 16. apríl, men álopini hildu fram.