Anna forkvinna og Sjúrður næstformaður í Føroyanevndini

Anna Falkenberg er forkvinna og Sjúrður Skaale er næstformaður í Føroyanevndini hjá fólkatinginum eftir nevndarvalið í gjár.

Anna Falkenberg er eisini næstforkvinna í arktisku sendinevndini.

Hon er haraftrat í uttanríkispolitisku nevndini, rættarnevndini, grønlandsnevndini og í Norðurlandaráðnum.

Hetta eru somu sessir, sum hon hevði í seinasta valskeiði.

Sjúrður næstformaður

Sjúrður Skaale er, umframt at vera næstformaður í Føroyanevndini, eins og hann var seinasta skeið, eisini varalimur í uttanríkispolitisku nevndini.

- Heitið er varalimur, men eg havi eina avtalu við danska Javnaðarflokkin, sum sigur, at eg sleppi inn, tá mál eru fyri, sum eru áhugaverd hjá mær, sigur Sjúrður Skaale.

Tað sama er galdandi fyri allar aðrar fólkatingsnevndir, sigur Sjúrður Skaale:

- Sama hvørja nevnd, talan er um, sleppi eg altíð inn, um tað skuldi verið viðkomandi, sigur hann.

Sjúrður Skaale er eisini limur í arktisku sendinevndini.