Fær endurgjald fyri svimjihøll

Sannlíkt er, at Runavíkar kommuna hevur fingið, ella kann fáa, meirvirðisgjald endurgoldið fyri svimjihøllina.

Tað sigur Aksel V. Johannesen, landsstýrismaður, í svari til Steffan Abrahamsson Løkin, løgtingsmann, sum spurdi, hví svimjihøllin í Runavík ikki lýkur treytirnar fyri MVG-afturbering.

Landsstýrismaðurin sigur, at svimjihøllin í Runavík lýkur ikki treytirnar fyri afturbering sambært grein 3 í lógini um meirvirðisgjald, tí tann greinin umfatar ikki kommunur. 

Hon er ætlað felagsskapum, stovnum og grunnum, sum gera íløgur í ikki vinnuligt, almannagagnligt frítíðarvirksemi. Kommunur eru ikki við her. 

Men Runavíkar kommuna er, eins og aðrar kommunur, í kommunalu skipanini, har 75 prosent av inngangandi meirvirðisgjaldi, meirvirðisgjaldi, sum kommunan hevur goldið, kann vera endurgoldið.

Fær endurgjald

Tað er tí sannlíkt, at Runavíkar kommuna antin hevur fingið, ella kann fáa, meirvirðisgjaldið endurgoldið.

Aksel V. Johannesen sigur, at í løtuni er eingin ætlan um at broyta MVG-afturberingina til kommunurnar. 

Landsstýrið og Kommunufelagið hava sett arbeiðsbólk at koma við tilmæli um dagførdan fíggingarleist fyri eldraøkið.
 
Í stuttum er tað um at tryggja grundarlagið, so kommunurnar megna at lyfta vaksandi uppgávurnar hjá eldraøkinum. 

Í tí sambandi vera fíggjarlig viðskifti millum land og kommunur viðgjørd, sum til dømis MVG-afturberingin til kommunurnar.