Iran: Hormuzsundið er aftur stongt

Iran boðaði í gjárkvøldið frá, at Hormuzsundið nú aftur er stongt, og at skip, sum royna at sigla gjøgnum sundið, verða skotin.

Amerikanski herurin noktar fyri, at sundið er stongt, og sigur, at skip enn kunnu sigla gjøgnum tað. Tað er tí ógreitt júst, hvør støðan er í løtuni. Tað skriva millum annað danska og bretska kringvarpið

Iranska fráboðanin kom eftir amerikonsk álop um alt landið í Iran um tíggju tíðina í gjárkvøldið, okkara tíð. 

Umframt at Iran sigur seg hava stongt Hormuzsundið, hevur landið eisini svarað amerikonsku álopunum aftur við at leypa á amerikonsk hernaðarlig mál í Kuvait, Barain og Jordan. 

USA og Iran hava nú lopið á hvønn annan í Miðeystri í tveir dagar, og Donald Trump, amerikanski forsetin, segði við tíðindamiðilin Fox í nátt, at Iran skal bumbast í sor í dag, um teir nokta at skriva undir friðaravtaluna.