Sjúkrarøktarfrøðingar handa sáttmálakrøvini hósdagin

Felagið føroyskir sjúkrarøktarfrøðingar fer á fyrsta samráðingarfund við lønardeildina í Fíggjarmálaráðnum hósdagin. 

Óluva í Gong, forkvinna í felagnum, sigur, at talan verður um stuttan fund, har krøvini verða handað. 

- Tveir innleiðandi fundir eru eisini settir á skránna, har gingið verður í gjøgnum krøvini, og hvat vit gera, sigur forkvinnan.

Onga viðmerking til lønarkarmin

Hon hevur onga viðmerking til spurningin, um krøvini frá Felagnum føroyskir sjúkrarøktarfrøðingar eru innan fyri felagskarmin, sum 12 fakfeløg og Fíggjarmálaráðið hava avtalað. Sambært lønarkarminum verður lønarhækkingin 3,87 prosent, frá 1. oktober í fjør til 30 september í ár.

Felagið føroyskir sjúkrarøktarfrøðingar er ikki við í avtaluni um lønarkarmin. 

Sáttmálin hjá sjúkrarøktarfrøðingafelagnum fór úr gildi 1. januar í ár.