USA og Iran hava skrivað undir avtalu

Amerikanski forsetin, Donald Trump, og iranski starvsbróðir hansara, Masoud Pezeshkian, skrivaðu í gjárkvøldið undir rammuavtaluna, sum skal tryggja vápnahvíld og frið í krígnum millum londini bæði.

Iranski forsetin skrivaði undir heima í Iran, men amerikanski forsetin skrivaði undir avtaluna á Versailles-slottinum í París, har hann er á toppfundi saman við leiðarunum í hinum G7-londunum.

Avtalan er í 14 punktum, og hóast hon ikki er almannakunngjørd, hava amerikonsku sjónvarpsrásirnar, CNN og Fox, fingið innlit í avtaluna frá amerikonskum embætisfólkum.

Avtalan, ið sum skilst er eitt ætlanarskriv, leggur upp til, at Iran aftur sleppur at útflyta olju, og tað verður gjørt við undantaksloyvi frá USA. Hon leggur eisini upp til, at skipaferðslan í Hormuzsundinum verður sum áður, skrivar danska kringvarpið.

Skal ikki fáa sær kjarnorkuvápn

Ein annar partur av avtaluni snýr seg um ríkaða uranið, sum Iran hevur havt á goymslu. USA hevur - við stuðli frá Ísrael - kravt, at uranið skal burturbeinast, men tað leggur avtalan ikki upp til. Iran gongur við til, at landið ikki skal fáa sær, ella keypa, kjarnorkuvápn, men tað stóð eisini í avtaluni frá 2015.

Hvat ríkaða uraninum viðvíkir, sigur avtalan, at tað verður verandi í Iran, men tað verður tynt og undir eftirliti av altjóða kjarnorkustovninum.

Hormuzsundið hevur verið stóra knútapunktið, síðan kríggið byrjaði. Tað skal lata uppaftur, og Iran vil skipa so fyri, at ferðslan verður tryggjað uttan kostnað næstu tveir mánaðirnar. Hvat hendir aftaná, er ikki greitt, men sambært tí, sum Mohammad Bagher Ghalibaf, formaður í iranska tjóðartinginum, segði við BBC, verður ikki farið aftur til støðuna fyri kríggið.

2.000 mia. kr. til endurbygging

Seinasti parturin av avtaluni snýr seg um endurbyggingina av Iran og at taka av allar handilsforðingar móti landinum. Hvussu tað verður gjørt, er ikki greitt enn, men tað tykist greitt, at avtalan eisini inniheldur ein endurbyggingaravtalu uppá 300 milliardir dollarar tað vil siga slakar 2.000 milliardir krónur í okkara peningi.