Tóra Petersen leiðari á Sernámi

Tóra Petersen er sett í starvið sum deildarleiðari fyri Sernám, sum nú er deild í Undirvísingarstýrinum.

Tóra Petersen er útbúgvin sálarfrøðingur og hevur eisini ph.d.-prógv í sálarfrøði. 

Hon hevur drúgvar royndir, bæði sum sjálvstøðugur sálarfrøðingur og frá ymiskum almennum stovnum. 

Seinasta árið hevur hon verið virkandi stjóri á Sernámi, og frammanundan var hon í fimm ár trivnaðarráðgevi hjá Námi.

Stovnurin lagdur saman við Undirvísingarstýrinum

Sernám hevur verið sjálvstøðugur stovnur, men síðani 1. juni hevur stovnurin verið ein deild undir Undirvísingarstýrinum, og tí var søkt eftir deildarleiðara.

Deildarleiðarin verður partur av leiðslubólkinum í Undirvísingarstýrinum og skal virka fyri, at bygnaðarliga tilgongdin at skipa økið av nýggjum, ber á mál. 

Tætt samstarv er millum Undirvísingarstýrið og Nám á fleiri økjum, og deildarleiðarin skal styrkja knýtið til Nám í sambandið við námsfrøðiliga menning og ráðgeving.

Tóra Petersen tekur við starvinum 1. august. 

Seks umsóknir vóru til starvið.