Lættari at uppliva Føroyar við almennari ferðslu

Nú skal eitt nýtt ferðafólkakort gera tað lættari at uppliva Føroyar við almennari ferðslu.

Endamálið við nýggja kortinum er at eggja fólki at nýta almennu ferðsluna og samstundis minka um trýstið frá vaksandi bilaferðslu á smærri ferðamálum.

Tað skrivar Strandferðslan, sum hevur givið nýggja kortið út.

Ferðafólkakortið er serliga ætlað ferðafólkum, og endamálið er at geva íblástur til, hvussu almenna ferðslan kann nýtast at vitja ymisk ferðamál kring landið á ein lættan og umhvørvisvinarligan hátt.

Umframt at virka sum eitt vanligt rutukort, er eisini ein faldari við ítøkiligum uppskotum til dagstúrar um allar Føroyar. 

Útgangsstøðið á øllum túrunum er Farstøðin í Havn, sum er høvuðsknútapunktið hjá Strandferðsluni, og teir fevna um ferðamál í øllum landinum.