ES-forkvinnan: Eiga at seta aldursmark fyri at brúka sosialar miðlar

ES eigur at seta aldursmark fyri, nær børn skulu hava atgongd til sosialar miðlar. 

Tað sigur forkvinnan í ES nevndini, Ursula van der Leyen, nú nýggj frágreiðing hevur staðfest samanhang millum mistrivnað og nýtslu hjá ungum av sosialum miðlum.

Serfrøðingarnir, sum hava skrivað frágreiðingina, mæla til, at ES bannar børnum, yngri enn 13 ár, atgongd til sosialar miðlar. 

Frá 13 ára aldri, til tey gerast 18 ár, skulu tey so líðandi fáa atgongd til sosialar miðlar, men bert um tað er trygt, og tey skulu einans hava atgongd til innihald, sum er hóskandi til aldurin.

Ursula von der Leyen heldur, at børn skulu hava tryggari byrjan til lívið á netinum: 

 - Sosialir miðlar kunnu kveikja og skapa sambond. Men tá ein av trimum ungum siga, at sosialu miðlarnir fáa tey at kenna seg sperd, kedd ella at vera hildin uttanfyri, so kunnu vit ikki skúgva hesar avleiðingarnar til viks.

Tíðin komin til broytingar

 - Tá ein fjórðingur av okkara ungu verður útsettur fyri ivasomum innihaldi á netinum - frá haturstalu til óvæntaðan harðskap - er tað greitt tekin um, at tíðin er komin til broyting, sigur Ursula von der Leyen.

Frágreiðingin mælir harumframt til, at børn, yngri enn 3 ár, als ikki skulu hava atgongd til skíggjar.

Avstralia var fyrsta landið í heiminum, sum bannaði børnum, sum eru yngri enn 16 ár, at brúka sosialar miðlar. 

Her heima er hetta eisini partur av samgonguskjalinum hjá ABC-samgonguni við Beini Johannesen, løgmanni, á odda - at banna børnum yngri enn 15 ár atgongd til sosialar miðlar, umframt at snildfonir skulu úr skúlunum.