Kunnu skera sær flag í nýggjari útstykking

Fólki í Vága kommunu stendur nú í boði at skera sær flag í nýggju útstykkingini á Heiðatrøðni í Miðvági. 

Arbeiðið við at gera fyrstu tíggju grundstykkini byggibúgvin byrjar 10. august.

J&K Petersen skal gera arbeiðið.

Til arbeiðið byrjar 10. august, bjóðar Vága kommuna fólki at skera sær flag á økinum til egna nýtslu. 

Hetta er eitt uppskot hjá Elsibet Jacobsen, býráðslimi, skrivar Vága kommuna.

Kann nýtast til smærri verkætlanir

Flagið kann nýtast til smærri verkætlanir, eitt nú til nýggjan grasvøll, til at javna lendi og til at leggja flag á takið á einum úthúsi.

Útstykkingin á Heiðatrøðni er fyrsta stigið til at menna størt bústaðarøki í Miðvági. 

Seinni verður tað bundið saman við bústaðarøkinum á Heiðum.

Tey, sum vilja hava flag, vera biðin um at seta seg í samband við Vága kommunu, sigur kommunan.