Venesuela: Talið á deyðum eftir jarðskjálvtavanlukkuna nærkast 5.000

Talið á deyðum í hørðu jarðskjálvtunum í Venesuela fyri góðum tveimum vikum síðani er nú 4.490, upplýsir formaðurin í tjóðartinginum, Jorge Rodríguez.

Almenna talið á særdum er 16.740, 6.462 fólk eru bjargað undan hústoftum, og umleið 18.000 hava mist hús og heim.

Rodríguez segði í gjár, at av teimum, sum eru funnin deyð, eru 315 ikki eyðmerkt enn. Talið á deyðum fer helst at vaksa nógv næstu dagarnar.

Í næstu viku fer stjórnin í Venesuela undir at veita heimleysu fólkunum bústað. Sera fáir venesuelar hava trygging.

Rodríguez segði, at tilsamans 856 bygningar hava fingið skaða: 190 av teimum liggja í sori. Nógvir av bygningunum vera helst tiknir niður.

Minni enn ein minuttir millum skjálvtarnar

Tað var 24. juni, at norðurstrondin í Venesuela var rakt av tveimum jarðskjálvtum, sum vóru mátaðir til ávikavist 7,2 og 7,5, og minni enn ein minuttur var millum teir.

Venesuela, sum longu er í kreppu orsakað av vánaligari leiðslu í landinum í fleiri ár, og av amerikonsku revsitiltøkunum, var ikki ført fyri at handfara støðuna, tá ið jarðskjálvtarnir vóru, og dagarnar eftir jarðskjálvtarnar.

Bjargingarlið úr fleiri londum við serkunnleika í jarðskjálvtum, eitt nú USA, Meksiko, Kolumbia, El Salvador og fleiri evropiskum londum, vóru skjót at hjálpa Venesuela, og fóru alt fyri eitt at leita eftir fólkum undir húsatoftunum, skrivar NTB.