Upsavirki stúra fyri at missa MSC-góðkenning

-Tað verður ein vanlukka fyri upsavirkini, um MSC-góðkenningin rýkur, tí talið av fiskidøgum bara verður økt uttan um umsitingarætlanina.

Tað sigur Jens Pauli Petersen, stjóri á Faroe Origin í Saltangará, sum fyrst og fremst tekur ímóti upsa.

Hann stúrir fyri, at MSC-góðkenningin av føroyska upsafiskiskapinum kann verða tikin aftur, um Bárður á Steig Nielsen, landsstýrismaður í uttanríkis- og fiskivinnumálum, fer at útluta eyka fiskidagar til útróðrarbátarnar í bólki 5.

Jens Pauli Petersen, Faroe Origin og Jens Pauli Petersen

Landsstýrismaðurin boðar frá ætlanini í svarunum upp á tveir grein 52a-fyrispurningar frá tingmonnunum Sámali Petur í Grund úr Sjálvstýri og Fróða Magnussen úr Fólkaflokkinum. 

Báðir spurdu um, hvat landsstýrismaðurin ætlar at gera, nú tað er nærum vist, at bólkur 5 verður í uppisetri fyri fiskidagar, áðrenn árið er runnið.

Bárður á Steig Nielsen endar svarini til báðar tingmenninar við hesum orðum:

"Nú fiskiskapurin er góður, og skipanin verður eftirmett, ætlar landsstýrismaðurin at lata fleiri fiskidagar í inniverandi ári."

Og tað hevur fingið nógv í fiskivinnuni at stúrsa við.

Marita Rasmussen, Havstovan

Eitt nú segði Marita Rasmussen, stjóri á Havstovuni, í Degi og Viku fríggjakvøldið, avgjørd, at tað var brot á umsitingarætlanina, um landsstýrismaðurin nú koyrir fleiri fiskidagar inn í skipanina.

Umsitingarætlanin er eitt umsitingaramboð, sum skal tryggja, at veiðan eftir toski, hýsu og upsa er burðardygg.

Og tá landsstýrismaðurin hvørt ár ásetir fiskadagatalið í kunngerð, skal tað sambært sjófeingislógini gerast í samsvari við umsitingarætlanina.

Tað vóru Fiskimálaráðið, Vørn og Havstovan, sum saman við vinnuni gjørdu umsitingarætlanina í 2021. Millum annað tí heldur stjórin á Faroe Origin tað vera eina greiða andsøgn, at landsstýrismaðurin nú brúkar eftirmetingina av skipanini sum argument fyri at útluta fleiri dagar.

Hoyr innslag í útvarpstíðindunum: