Rúnasteinurin talgildur

Rúnasteinurin, sum var funnin á Sondum á Sandi, verður 3D-skannaður, og eitt talgilt modell verður gjørt av honum. 

Umframt at varðveita rúnasteinin í talgildum líki, kann 3D-modellið brúkast til nærri kanningar, tí tá ber til at seta ljós og skuggar, sum gera rúnaskiftina lættari at lesa. 

Nakað er brotnað av rúnasteininum.

Og nakrar rúnir eru kámaðar burtur. 

Fornfrøðingarnir á Tjóðsavninum halda seg tó kunna týða orðini “hvílir” og “her.”

Tað kundi bent á, at talan er um gravstein. 

Rúnasteinurin var funnin í gólvinum í einum bygningi, sum fornfrøðingarnir halda er bønhús úr miðøld. 

Fornfrøðiligi útgrevsturin á Sondum heldur fram í august.

Tá kemur eisini ein serfrøðingur til Føroya at kanna rúnasteinin.