Vestergaard: Kom óvart á, at pengar mangla til Fámjinsvegin

Tað kom óvart á Jacob Vestergaard, landsstýrismann í samferðslumálum, tá Landsverk í dag upplýsti, at pengarnir til vegaføringina úr Fámjinstunlinum oman í Fámjin ikki røkka til at gera vegin eftir dagsins tørv.

Mest átrokandi ábøturnar verða eftir ætlan lidnar móti ársenda. Men skal vegurin gerast heilt liðugur, so mugu fleiri pengar játtast. Tað sigur Sigurð Ó. Vang, deildarleiðari á verkætlanardeildini hjá Landsverki, við Kringvarpið.

Jacob Vestergaard sigur hinvegin, at hetta var nýggj vitan fyri hann, og at landsstýrið nú má taka støðu til málið í sambandi við komandi raðfestingar.

Landsstýrismaðurin vil ikki binda seg til, at neyðugi peningurin verður játtaður, tí tað er Løgtingið, sum endaliga ger fíggjarligu raðfestingarnar.

Spurdur, hvussu leingi fámjiningar skulu bíða eftir einum lidnum vegi, sigur Jacob Vestergaard, at tað helst eigur at verða innan eitt ár.

Hoyr innslag her: