Mjørki: Lech Poznań sleppur ikki til Føroya í kvøld

Leiguflogfarið við Lech Poznań, sum skuldi lenda í Vágum seint seinnapartin, er avlýst vegna veður. Øll flogferðsla til og úr Vágum seinnapartin og í kvøld er avlýst vegna mjørka vesturi í Vágum.

Ætlanin er nú, at pólska liðið flýgur til Føroya í morgin árini. Lech Poznań skal eftir ætlan spæla Europa League-undankappingardyst móti KÍ á Tórsvølli í annaðkvøld.

– Vit hava biðið teir koma tveir dagar frammanundan, men teir hava ikki lurtað, sigur Tummas Lervig, formaður í KÍ.

Lech Poznań hevur sent KÍ fyrispurning um at útseta dystin ein dag. Men sambært KÍ-formanninum er tað ikki bara sum at siga tað, tí KÍ hevur eisini dystir í heimligu kappingini at taka atlit at.

Sambært UEFA-reglunum skal eitt útilið vera komið fram í seinasta lagi kvøldið fyri dystin. UEFA kann tó taka atlit at umstøðum, sum liðið ikki hevur ræði á, og kann broyta dystartíð ella dystardag, um tað verður neyðugt.

KÍ hevur enn ikki fingið boð frá UEFA um nakra broyting. Tekniskur fundur verður fyrrapartin í morgin, og tá kann støðan gerast greiðari.

Lech Poznań boðar sjálvt frá, at fráferðin til Føroya er útsett til klokkan átta í morgin árini, pólska tíð. Sum støðan er nú, verður dysturin framvegis spældur á Tórsvølli sum ætlað í annaðkvøld klokkan hálvgum sjey.