Nógvar broytingar um hægri útbúgving

Fróðskaparsetrið vil hava útbúgvingar, sum fevna víðari enn núverandi skipan loyvir.

Tí ætlar Mentamálaráðið at broyta lógina um Fróðskaparsetrið.

Ítøkiliga er uppskotið sprottið úr einari diplomútbúgving í námsfrøði, sum gevur lesandi fakligar 
førleikar at virka á tí námsfrøðiliga økinum, hóast talan ikki er um fullar bachelorútbúgvingar. 

Samstundis er ein eftirútbúgvingarskipan fyri fólkaskúlalærarar á veg.

Eftirútbúgvingarnar vera skipaðar sum masterútbúgvingar. 

Lógarbroytingarnar geva møguleika at skipa útbúgvingar, sum heimild ikki er fyri í dag.

Góðskutrygging

Tær kunnu sum frá líður geva betri amboð til at skipa útbúgvingar við størri smidleika enn áður, 
og størri samanhang millum ymiskar útbúgvingar, sigur Mentamálaráðið. 

Uppskot er eisini um betri góðskutrygging. 

Og siðvenjan um stakskeið skal í lógina.

Ein onnur broyting er, at Fróðskaparsetrið kann eisini gera fólk, sum hava útint serstakt mentanarligt 
lívsverk við serligum týdningi fyri føroyska samfelagið, til heiðursdoktara. 

Galdandi lóggáva er frá 2008 og broytt í 2012.