Barnabati: Hækkaða orkuískoytið eigur at koma børnum til góðar

Hvussu kemur uppskotið um at hækka orkuískoytið børnunum til góðar?

Tann spurningurin er grundleggjandi at taka við, nú løgtingið viðger uppskotið hjá Tjóðveldi og Sjálvstýri um at hækka orkuískoytið.

Tað sigur Barnabati í skrivi til trivnaðarnevndina hjá løgtinginum.

Barnabata dámar væl, at inntøkumørkini fyri at fáa ískoytið verða hækkað. 

Samstundis er týdningarmikið at hyggja at familjunum við mørkini. 

Verður ikki brádliga væl fyri

Ein familja verður ikki brádliga fíggjarliga væl fyri, tí ársinntøkan er eitt sindur hægri enn eitt ásett mark, sigur Barnabati.

Barnabati tekur ikki støðu til eina ávísa upphædd fyri ognarmarkið. 

Men ogn á pappírinum gevur ikki altíð eina rættvísandi mynd av, hvussu nógv familjan í veruleikanum hevur at liva av hvønn mánað. 

Familjur kunnu hava høgar fastar útreiðslur og lítið gjaldføri, hóast tær hava ogn.

Og er stuðulin nóg lættur at fáa hjá familjunum, sum hava størsta tørvin, spyr Barnabati.