Vil hava eldrakekk sum í Danmark

Lágløntir fólkapensjónistar eiga at fáa ein eldrakekk, sum er 26.000 kr. um árið, er ogn teirra minni enn 108.000 kr. 

Tað heldur Áhugabólkur pensjónista, sum hevur verið á fundi í trivnaðarnevndini um orkuískoytið. 

Áhugabólkurin tekur undir við uppskotinum hjá Sjálvstýri og Tjóðveldi um at hækka orkuískoytið í ár.

Men hann heldur, at ognarmørkini eru alt ov lág. 

Áhugabólkurin vísti á, at løgtingið kann samtykkja at geva lágløntum pensjónistum, fólkapensjónistum og fyritíðarpensjónistum ein eldrakekk ella pensjónskekk eftir danskari fyrimynd.

Eldrakekkur

Í Danmark fáa lágløntir fólkapensjónistar eldrakekk, sum er 26.000 kr. um árið, um tey eiga minni enn 108.000 kr.  

Eisini var víst á, at tað hevði gjørt stóran mun hjá fyritíðarpensjónistum, fingu teir útgoldið óbrúktan fyritíðarpensjónsfrádrátt.

Áhugabólkurin sigur, at nakrar pensjónir eru fleiri túsund krónur undir markinum fyri fátækraváða.

Sambært uppskotinum hjá Sjálvstýri og Tjóðveldi skal orkuískoytið bara hækka í ár.

Áhugabólkur pensjónista heldur, at neyðugt er alt fyri eitt at arbeiða við átøkum í 2027.