Zelenskyj: Innihaldsríkur fundur við sendimenninar

Ukrainski forsetin, Volodymyr Zelenskyj, sigur, at fundurin við amerikonsku sendimenninar, Steve Witkoff og Jared Kushner, í Kyiv í gjár var innihaldsríkur.

Tað skrivar Ritzau.

Á fundinum varð millum annað tosað um trygd og búskaparliga trygd til Ukraina, rakettir til loftverju, umframt ein stuðulspakka, sum skal hjálpa Ukraina gjøgnum veturin.

Zelenskyj vónar, at samráðingar millum Ukraina, Russland og USA skjótt kunnu takast uppaftur. Samstundis væntar hann, at kríggið fer at halda fram í vetur.

Vóru fyrst í Moskva

Witkoff og Kushner komu til Kyiv eftir at hava hitt russiska forsetan, Vladimir Putin, í Moskva leygardagin. Teir báðir amerikonsku sendimenninir royna at fáa semju um eina loysn at fáa enda á krígnum.

Steve Witkoff sigur, at bæði Ukraina og Russland noyðast at gera neyðsemjur, um tað skal eydnast at fáa enda á krígnum.