Laksaútflutningurin vaksin eina milliard

Stórur vøkstur er í føroyska útflutninginum. 

Farna árið, frá 1.august í fjør til 31. juli í ár, útflutti føroyskt vinnulív fyri knappar 14 og eina hálva milliard krónur.

Tað er heilar 1,8 milliardir krónur meira enn árið fyri.

Tað er serliga økti laksaútflutningurin, sum sæst aftur í útflutningstølunum. 

Farna árið hava Føroyar útflutt laks fyri 6,8 milliardir krónur. Tað er ein milliard meira enn árið fyri. Nøgdin fór úr 100.000 tonsum upp í 125.000 tons.

1,6 milliardir fyri tosk

Men eisini góða gongdin hjá botnfiskaflotanum sæst aftur í nýggjastu útflutningstølunum. 

Føroyar útfluttu tosk fyri 1,6 milliardir krónur farna árið, tað eru smáar 400 milliónir krónur meira enn árið fyri. Í nøgd fór toskaútflutningurin úr 18.000 upp í 20.000 tons. 

Í virði er toskur nú næststørsta, einstaka útflutningsvøra - størri enn makrelurin, sum Føroyar útfluttu fyri smáar 1,6 milliardir. Afturgongdin í makrel'útflutninginum er smáar 200 milliónir farna árið, sammett við árið fyri.

Samanlagt er føroyski útflutningurin, frá 1.august í fjør til 31.juli í ár, øktur 11,6 prosent í virði í mun til árið fyri. Men samlaðu nøgdirnar eru tó minni, smá 50.000 tons, svarandi til 7,8 prosent.

Tað eru serliga svartkjaftur og makrelur, sum vit útflyta minni av í nøgd.