Tveir útlendingar ákærdir fyri at smugla rúsevni til Íslands

Tveir útlendingar eru ákærdir í sambandi við stóra rúsevnasmugling við Norrönu í juni.

Ein belgiskur maður og ein kvinna eru ákærd fyri at hava smuglað nærum 70 kg av rúsevnum til Íslands. 

Rúsevnini vóru fjald í trimum støðum í einum húsvogni, sum parið ferðaðist í, tá tey komu til Íslands við Norrönu. 

56 kg av amfetamini, átta kg av kokaini, trý kg av ketamini, nærum eitt kg av MDMA og ketaminblanding, og nærum eitt kg av metamfetamini vórðu funnin í húsvogninum.

Tá ið parið kom til Íslands, helt maðurin fram við ferðini einsamallur í bilinum. Hann varð handtikin á tjaldingarplássinum í Akureyri dagin eftir.

Kvinnan fleyg hinvegin av Egilsstøðum sama dag, sum hon kom til Íslands, á veg heim til Belgia.

Maðurin er 53 ár og kvinnan 29 ár.

Skuldi síggja nátúrligari út

Sambært ákæruritinum, smuglaði maðurin rúsevnini og hevði kvinnuna við sær fyri at fáa ferðina at síggja natúrligari út. 

Kvinnan er ákærd fyri at hava verið við í stórari rúsevnasmugling við at hjálpa manninum við smuglingini. 

Sambært ákæruritinum gjørdi hon tað við at ferðast við honum úr Belgia til Danmarkar og síðani víðari til Íslands, fyri at fáa ferðina hjá teimum at síggja meira trúliga út, skrivar íslendska kringvarpið, RÚV.