500 umsóknir um leigustuðul

Nú nærkast dagurin, tá fyrsti leigustuðulin verður goldin.

Higartil hevur Almannaverkið fingið næstan 500 umsóknir.

Ikki er greitt, hvussu stórt fyrsta útgjaldið verður, tí allar umsóknir eru ikki viðgjørdar enn, sigur Almannaverkið.

Leigustuðul verður rindaður mánaðarliga afturút á kontu hjá umsøkjaranum.

Í mesta lagi 1.500 kr. 

Leigustuðulin er 20 prosent av húsaleiguni, sum er ásett í leigusáttmálanum, men tó í mesta lagi 1.500 kr. um mánaðin.

Hjá húskjum, har eitt fólk er yvir 18 ár, lækkar leigustuðulin fimm prosent av inntøkugrundarlagnum, sum er omanfyri 350.000 kr.

Eru tvey fólk ella fleiri yvir 18 ár, lækkar stuðulin fimm prosent av inntøkugrundarlagnum, sum er omanfyri 500.000 kr.

Verður leigustuðulin minni enn 300 kr., fellur hann burtur.

Mett verður, at leigustuðulin kostar seks milliónir fyri teir tríggjar mánaðirnar, hann skal latast í ár.