Ólógligt at mótmæla í miðbýnum í París

Tað verður ólógligt at mótmæla í pørtum av París í dag, boðar franska løgreglan frá. 

Hetta hendir eftir ófrið og rán í fleiri býum í Fraklandi seinastu tíðina.

Forboðið fevnir um miðbýin í franska høvuðsstaðnum, og verður í gildi frá kl. 8 á morgni til kl. 6 á kvøldi.

Mótmælisgongur verða bannaðar millum uttan fyri forsetaborgina og á Place de la République, umframt við væl umtókt ferðafólkaøki sum Louvre-savnið og Champs-Élysées.

Forboðið fyri mótmælisgongum er eitt av fleiri tiltøkum, sum myndugleikarnir í Fraklandi seta í verk, at forða fyri nýggjum ófriði. 

Eisini útgongubann

Harumframt er útgonguforboð sett í gildi í fleiri býum og pørtum av Paris.

Løgreglan hevur eisini sett í gildi fyribils bann fyri at bera dósir og fløskur av bensini, fyri at forða fyri, at eldur verður settur á bilar og bygningar.

Nýggjar stórar mótmælisgongur eru kunngjørdar at vera um vikuskiftið. 

Rørslan Gulir vestar, sum skipaði mótmælisgongur í gjár, hevur boðað frá mótmælisgongu frá Place de la Bastille leygardagin.

Franski forsætisráðharrin, Sébastien Lecornu, sigur, at stór løgreglulið vera hjástødd.

Eisini er boðað frá stóri landsumfatandi mótmælisgongu 5. november.