Tónaskaldið Kári Bæk fær Heiðursgávu landsins 2026

Kári Bæk tónaskald, tónleikari og kórleiðari fær Heiðursgávu landsins 2026, sum 75.000 krónur. 

Kári Bæk hevur í meira enn hálva øld verið ein týðandi partur av føroyskum tónleikalívi. Sum tónaskald, tónleikari og kórleiðari hevur hann havt stóran týdning fyri menningina av bæði klassiskum tónleiki og føroyskum kórsangi.

Sum tónaskald er Kári serliga kendur fyri sínar útsetingar og kompositiónir til kór, men hann hevur eisini skrivað fjølbroyttan ljóðføristónleik til bæði smærri og størri bólkar. Fyri verkið Askur & Embla – Fyrsti dagur má vera var hann í 2012 í uppskoti til Tónlistavirðisløn Norðurlandaráðsins.

"Kári Bæk hevur í meira enn hálva øld verið ein týðandi partur av føroyskum tónleikalívi."

Bárður á Lakjuni, landsstýismaður í mentamálum

 

Kári hevur verið kórleiðari í nógv ár og hevur millum annað stjórnað Vestmanna sangkóri, Tórshavnar kamarkóri, Tórshavnar manskóri og Cantus Borealis. Hann hevur eisini verið dirigentur hjá GHM og hevur spælt obo í Føroya Symfoniorkestri.

Kári Bæk hevur verið framsøkin og hevur avrikað nógv bæði innan fólksliga kórsangin og elitukórsangin.

Kári Bæk, Ernst Sondum Dalsgarð og Árni Hansen spæla undir til hjá einum kóri. Helst til jólakonsert á Venjingarskúlanum í 1978 (Mynd: Privat á Facebook)

 

Útbúgvin lærari

Hann er útbúgvin lærari við tónleiki sum frálærugrein. Eftir læraraprógvið fór hann at lesa til cand. pæd. í tónleiki á Danmarks Lærerhøjskole.

Kári Bæk hevur við sínum drúgva og fjølbroytta virksemi sett djúp spor í føroyska tónleikasøgu. Við høgum listarligum málsetningum, stórum eldhuga og áhaldandi arbeiði hevur hann gingið á odda í menningini av føroyskum kórsangi og klassiskum tónleiki.

Fyri framúrskarandi arbeiðið tónleikinum og kórsanginum at frama fær Kári Bæk Heiðursgávu landsins 2026.

 

Heiðursgáva landsins er 75.000 krónur. Hon verður latin persónum, sum hava gjørt eitt týðandi arbeiði fyri at styrkja og fremja mentanarlig virði innan føroyska mentan, list og mentanararv.