143 nýggir persónbilar í oktober

Meir enn tvífalt so nógvir nýggir persónbilar vórðu skrásettir í oktober í ár samanborið við oktober í fjør.

Akstovan hevur kunngjørt seinastu hagtølini um skráseting av nýggjum bilum, og tey siga millum annað, at í oktober í ár vórðu 143 nýggir persónbilar skrásettir. 

Í oktober í fjør vórðu 69 nýggir bilar skrásettir, og sostatt er talan um ein vøkstur upp á meir enn 100 prosent.

Frá januar til og við oktober í ár eru tilsamans 1.262 nýggir persónbilar skrásettir.

Fyrstu tíggju mánaðirnar í fjør var hetta talið 1.040. Tað er sostatt ein vøkstur upp á 222 bilar ella góð 21 prosent.