- Tíðindi, mentan og ítróttur
Ljóarin
Hon nærkast pensiónsalduri - føroyska fosturtøkulógin, sum 1. oktober verður 66 ár.
Og nýggj tøl frá Javnaðarflokkinum á Fólkatingi vísa, at tað eftir øllum at døma eru rættuliga nógv fleiri føroyskar kvinnur, sum fáa fosturtøku enn higartil hildið.
Tískil er fosturtøka tema í hesum Ljóarara, her vit royna at lýsa evni við einum breiðum perspektivi.
Vit fáa orðið á Sjúrð Skaale, sum umboðar Javnaðarflokkin á fólkatingi, ið hevur umbiðið kanningina.
Vit tosa eisini við Turið Debes Hentze um føroysku fosturtøkulógina, sum er ein forboðslóg, og vit spyrja millum annað, hvørjir møguleikar eru at gera nýggja lóggávu.
Diana Reynstind, burðarfrøðingur og serlækni í kvinnusjúkum, greiðir frá, hvat ein fosturtøka er, og hvussu tað er at arbeiða sum lækni við verandi lóggávu.
Fyrst í seinra tímanum greiðir Turið Hermansdóttir, antropologur og phd-lesandi, frá um sína phd-gransking, har hon hevur spurt 20 kvinnur um teirra upplivingar við fosturtøku.
Í Føroyum kunnu kvinnur og pør fáa ráðgeving, um tær eru í iva um hvørt tær skulu velja fosturtøku, ella um tær bara hava tørv á at tosa við onkran um støðuna.
Tað er Gigni, sum varðar av fosturtøkuráðgevingini, og vit skifta orð við Sólrun Foldbo, ið er fakligur stjóri í Gigni.
Skal føroyska fosturtøkulógin broytast? Hesar og aðrar spurningar seta vit Elisu Vang frá Fríum Vali og Bjørk Sadembou frá Pro Vita.
Tú kanst hoyra sendingina her!