- Tíðindi, mentan og ítróttur
Ljóarin
- Eg havi altíð havt sera gott hugflog, og havi tað enn, sigur Elin Michelsen, sum júst hevur givið út aðru bókina í røðini um huldugentuna Tóru. Bøkurnar eru nakað so sjáldsamt sum uppruna føroyskar ungdómsfantasybøkur, sum taka støði í føroysku náttúruni og søgunum um huldur.
Elin Michelsen hevur altíð dámað og lisið nógvar fantasybøkur, og úr teimum fær hon íblástur. Men drívmegin at skriva er eisini at sleppa at skapa ein nýggjan og gandakendan heim, sum onnur kunnu sleppa inní.
- Sum barn og ung ímyndaði eg mær mangan, at eg hoyrdi heima í einum øðrum, gandakendum heimi, og tí er tað sera stuttligt, at eg nú kann brúka mítt hugflog til at skapa ein øðrvísi heim, har lesarin kanska kennir seg heima", sigur Elin.
Í "Varvarða" sleppur lesarin longri inn í gandaheimin og lívið á hulduskúlanum, men lesarin fær eisini betri innlit í kenslulívið hjá høvuðspersóninum Tóru og vinfólki hennara, sum øll eru tannáringar.
- Fantasybøkur venda sær ofta til ung, og tað er helst eisini tí, at eg skrivi til ung. Men tannáringaárini høvdu eisini serligan týdning fyri meg, tí eg m.a. fann útav, at eg hevði eina rødd, sum eg kundi brúka. Eisini havi eg húsini full av tannáringar beint nú, og tí er tað lætt hjá mær, at liva meg inn í teirra lív, vísir Elin á.
Lurtið eftir samrøðuni við Elina, har hon greiðir frá nýggju bókini og tað at skriva fantasybøkur til ung.