- Tíðindi, mentan og ítróttur
Málteigurin
Hvussu eru reglurnar, tá vit úttala fólkanøvn? Fleiri dømi eru, har fólk úttala sítt navn uttan at tað er í samsvari við galdandi mállæru ella reglur. Hvør hevur tá rætt? Tann, ið ber navnið, ella reglugerðirnar?
Dømi: Sólvit, sum fleiri høvdu úttalað Sølvit, men hann sigur sjálvur, at hann eitur Sóóólvit.
Ella navnið Dagfinn. Eitur tað Daggfinn ella Dææægfinn, sum viðkomandi sjálvur vil vera við.
- Reglurnar eru ógreiðar, og tá tað er talan um fólkanøvn er rættast at virða tað, sum viðkomandi, ið ber navnið, sjálv ella sjálvur sigur, heldur Elin Henriksen, málkøn.
Men hon leggur dent á, at í teimum førum har talan er um málføri, má tann, sum ber navnið, finna seg í, at málførini vinna.
- Eitur tú Jógvan ella Rógvi og flytur til Suðuroyar at búgva, so mást tú liva við, at tú verður kallaður Jogvan ella Rogvi.
Við síðuna á ella av
Umframt hetta evnið taka vit viðmerkingar frá lurtarum um evni, ið hava verið til viðgerðar, við.
Fyrisetingin hesa vikuna er við síðuna á ella av, og her tríva vit eisini í málilskuna 'við síðurnar av.'
- Tað er rætt og slætt møsn at siga, at okkurt er farið við síðurnar av, ella at eg siti við síðurnar av henni, tí tað merkir báðumegin. Og tað ber ikki til, sigur Elin Henriksen.