Fyrsta havnararbeiði, sum Ronald Poulsen hevði um hendur fyri Landsverkfrøðingin, var úti í Hesti. Hann var leiðari á deildini, sum hevði við smærri havnir at gera. Í slíkum ørindum var hann kring landið, í Miðvági, í Fugloy, í Svínoy, í Gøtu og í Húsavík. Avbjóðingarnar vóru ymiskar og í Gøtu slapp hann at royna kavarabúnan hjá Alexander Abrahamsen. Nógv ár arbeiddi hann fyri kommun-una á Strondum við havnargerðum og slíkum. Hann var tímaløntur og tók eisini arbeiði upp á seg aðrastaðni, eitt nú á Eiði. Strandingar komu fram á reint kelduvatn í kommununi og ætlaðu at fáa útflutning í lag. Keyparar vóru til reiðar, men bankin vildi ikki fíggja teir.