Føroyingar skulu ikki gera sær dælt av støðuni

Helle Thorning-Schmidt, forsætisráðharri, ávarar føroysku útflutningsvinnuna ímóti at gera sær dælt av støðuni, at russiska innflutningsbannið ikki umfatar Føroyar, samstundis sum ES hevur sett tiltøk í verk móti Russlandi.

Forsætisráðharrin svaraði í dag einum fyrispurningi frá Edmundi Joensen, fólkatingsmanni, um trygdarpolitisku støðuna í Evropa.

Helle Thorning Schmidt segði, at hóast russiski sendiharrin í Danmark hevur hótt við kjarnorkukríggi, er trygdarstøðan í Føroyum og Grønlandi ikki broytt.

Edmund Joensen segði, at Føroyar hava góð viðurskifti við Russland, og útflutningurin hagar er eisini nógv vaksin. Men mong stúra fyri nýggju, ágangandi uttanríkispolitisku kósini, sum Russland hevur sett, segði hann.