Vónar at uppskotið fær meira enn 17 atkvøður

Seinni í vikuni verður aftur samgongufundur um endaliga uppskotið um fiskivinnunýskipan, sum samgonguflokkarnir fara at bera í tingið mánadagin.

Hóast tað ikki eydnaðst at fáa eina semju við Sambandsflokkin, hevur Aksel V. Johannesen, løgmaður, vónir um, at fleiri enn 17 atkvøður verða fyri uppskotinum hjá samgonguni.

Hann sigur, at hóast lógin verður samtykt við teprum meiriluta, fer nýggja fiskivinnuskipanin at vera í gildi í mong ár.

Løgmaður vísir aftur,  at politiska handalagið í samgonguni er vánaligt, nú tað er greitt, at tað helst koma fleiri uppskot um nýggja fiskivinnunýskipan - frá samgonguni, Sambandsflokkinum og Fólkaflokkinum.

Aksel V. Johannesen var gestur í Degi og Viku í kvøld.