Eigur at bera til at finna fýra milliónir

Tað kemur ikki upp á tal at skarva túrar av ferðaætlanini, ella at siga starvsfólk upp.

Tað sigur Heðin Mortensen, landsstýrismaður í samferðslumálum, nú Strandferðslan hevur boðað frá, at neyðugt verður at seta sparitiltøk í verk, tí fýra milliónir kr. vanta í.

Landsstýrismaðurin var gestur í Degi og Viku í kvøld.

Hann sigur, at fíggjarætlanin hjá Strandferðsluni er 165 milliónir kr.  um árið, og tað má bera til at spara fýra milliónir í fíggjarætlanini, um tað ikki eydnast at fáa eina eykajáttan gjøgnum politisku skipanina.

Skal sparast, skulu sparingarnar fremjast saman við Samferðslumálaráðnum, sigur Heðin Mortensen.

Hann vísir aftur, at hann hevur tikið leiðsluna á Strandferðsluni av ræði.