Elisabet millum átta tær bestu í longdarlopi

Elisabet Holm Simonsen gjørdist nummar átta í finaluni í longdarlopið seinnapartin. 

Hennara besta lop var 5,34 metrar, og tað var nóg mikið til at koma millum átta tær bestu og fáa trý nýggj lop.

Tá eydnaðist kortini ikki at betra um longdina, og tískil endaði føroyski íðkarin nummar átta av 20. 

Tað var fitt av vindi undan - ov nógv til at lopið telur sum nýtt føroyskt met. Metið eigur Elisabet Holm Simonsen sjálv, og tað er 5,19 metrar og varð sett í juni.

Edna Maria Debes tók eisini lut í finaluni, og hennara besta lop var 4,98 metrar, og gav henni eitt 14. pláss. 

Kärt Õunapuu av Saaremaa vann greinina við einum lopi upp á 6,19 metrar.