Torkil Veyhe fimta pláss í tíðarkoyringini

Tað bleiv til eitt fimta pláss hjá Torkili Veyhe í tíðarkoyringini í dag. 

Sterki súkklarin hevði ætlanir um at verja gullið, sum hann vann í somu grein í Gotlandi á seinastu Oyggjaleikunum, men tað eydnaðist ikki. 

Størsta orsøkin til tað var óivað, at tíðarkoyringin í dag endaði uppi á nærum 400 metra hædd við eini klúgving upp á fýra kilometrar. 

Torkil Veyhe hevði næstbestu tíð niðri á sløttum, men misti eitt sindur á veg niðan eftir - nóg mikið til at heiðursmerkini gloppu honum av hendi. 

Dávur Magnussen endaði sum nummar 22, Helgi Winther Olsen sum nummar 24, Gunnar Dahl-Olsen varð nummar 35 og Jákup Petur Eliassen varð nummar 38 av 48 súkklarum. 

Hjá kvinnunum varð Súsanna Skylv Sørensen nummar fimm. Elsa Berg varð nummar 19, og Maria Svabo Hansen endaði nummar 26. 

Hósdagin er súkkling aftur á skránni. Tá verður tað vegsúkklukapping.