SEV rindar rokningina

SEV fer at rinda rokningina fyri eykakostnaðin, sum sambært SEV stendst av vindmyllulundini á Gellingarkletti.

Á eykaaðalfundi hjá SEV í dag, var avgjørt, at el-prísurin komandi ár verður tann sami sum í ár.

SEV vil vera við, at vindmyllulundin á Gellingarkletti fer at hava ein meirkostnað á 60 milliónir fram til 2025 við sær, tí SEV skal taka ímóti allari orkuni, men megnar bert at taka ímóti 18 prosentum av henni.

Hóast el-prísurin ikki verður hækkaður komandi ár, er møguligt, at hann hækkar í 2023. Tá fer SEV, um øll loyvi fáast til vega, undir at gera stóru pumpuskipanina í Vestmanna. 

Aðalfundurin í dag gav eisini SEV heimild til at læna 800 mió kr aftrat til at fíggja útbyggingarnar komandi árini, so at samlaðað lániloftið hjá SEV verður 2,2 milliardir krónur.

Av hesum metir SEV, at kostnaðurin fyri pumpuskipanina fer at kosta 1,2 milliardir krónur.