Húsaleigan trýstir fólk í fátækraváða

Árliga jóla- og stuðulskonsertin hjá Barnabata gav hesaferð stívliga 900.000 krónur. Saman við øðrum stuðulskrónum hevur hjálpartelagskapurin 1,3 millión krónur at lata sum stuðul til barnafamiljur í fátækraváða. Gávukortini fara út til 550 børn í Føroyum.

Barnabati hevur síðstu árini skrásett upplýsingar frá teimum, sum søkja. Og myndin er greið.

Nógv tey flestu, sum fáa jólahjálp, eru stakir uppihaldarar.  Størsti parturin, umleið 60 prosent, býr til leigu. Og húsaleigan merkist á pengapunginum. Hjá hesum familjum er meðal húsaleigan síðstu fimm árini farin úr 4400 krónum upp í 6800 krónur um mánaðin. Príshækkingin er 2400 krónur um mánaðin - meira enn 50 prosent. Tølini hjá Barnabata staðfesta, at húsaleigan rennur undan inntøkunum hjá teimum, sum søkja um stuðul.

Nógv søkja um hjálp, ár um ár. Umleið 60 prosent av teimum, sum fáa jólahjálp í ár, hava fingið jólahjálp oftari enn tríggjar ferðir. Børnini í hesum familjum hava sostatt livað í fátækraváða í meira enn trý ár. Tað gera tey, hóast eitt vaksandi tal av teimum, sum fáa jólahjálp, eru úti á arbeiðmarknaðinum og tjena til lívsins uppihald.

Djóni Eidesgaard, aðalskrivari í Barnabata, var gestur í sjónvarpsstovuni.