Kríggj í Ukraina: Lond skuldseta Russland fyri krígsbrotsverk

Ukrainski og russiski uttanríkisráðharrarnir samráddust í dag um millum annað 24 tímar vápnahvíld, men sambært ukrainska uttanríkisráðharranum eydnaðist ikki at semjast.

Dagurin hevur eisini verið merktur av, at býráðið í ukrainska býnum, Mariupol, í gjár boðaði frá, at eitt barna- og føðisjúkrahús í býnum var oyðilagt av bumbuálopum.

Fleiri lond vilja nú kanna, um Russland hevur framt krígsbrotsverk.

"Tað, tit síggja í sjónvarpinum, eru krígsbrotsverk. Ítøkilig prógv fyri krígsbrotsverkum skulu savnast saman - og tí arbeiða vesturlendsk lond fyri - so fólk kunnu vera drigin til svars fyri hetta. Lat tað vera greitt, at hetta er ikki eitt kríggj millum hervald. Putin hevur hertikið fleiri býir og er harvið farin í kríggj við ukrainska fólkið," segði James Heappey, enski verjumálaráðharrin.

Sambært ukrainskum myndugleikum doyðu trý fólk í álopinum - teirra millum eitt barn. 17 eru løstað.

Býurin er kringsettur og avskorin frá øllum vørum og veitingum. Tað er trupult at flyta fólk burtur, tí býurin aftur í dag hevur verið raktur av  spreingingum, sigur ukrainski varaforsætisráðharrin, sambært Reuters.

Samstundis nærkast ukrainski herurin Kyiv. Í býum nær við ukrainska høvuðsstaðin eru í dag fráboðanir um harðar bardagar.

ST væntar, at talið á flóttafólkum úr Ukraina nú liggur um 2,3 milliónir.

Flóttafólk, Ukraina

Frítekst tagging: 

Ukraina

flóttafólk