Fiskivinnuavtala kann seta Føroyar í ringt ljós

Meðan ES fyrireikar nýggj tiltøk móti Russlandi, gera Føroyar seg til reiðar at sessast aftur við samráðingarborðið um nýggjan fiskivinnusáttmála við júst Russland. Timingin er óheppin, metir danski serfrøðingurin í altjóða viðurskiftum, Flemming Splidsboel Hansen.

Í Degi & Viku hóskvøldið segði Árni Skaale, landsstýrismaður í fiskivinnumálum, at samráðingar vera við Russland um fiskiveiðiavtalu fyri 2023.

Flemming Splidsboel Hansen vísir á, at hóast Føroyar ikki gera beinleiðis ímóti tiltøkunum hjá ES, so kann myndin av Føroyum í nøkrum ES-londum gruggast - og fáa tey til at reagera. 

Árni Olafsson var við til fyrstu fiskivinnusamráðingar millum Føroyar og táverandi Sovjetsamveldið, afturi í 1977. Hann heldur, at retorikkurin er broyttur nógv hesi árini. Føroyar eiga at fylgja neyvt við, hvat Norra ger, sigur Árni Olafssson.

Og tað er púra greitt, at Norra fer hvørki at slíta ella broyta sítt fiskivinnusamstarv við Russland. Tað sigur Jógvan Hugo Garder, journalistur í Norra.