Fyrimyndin 2022: - Eg fái orku frá teimum ungu

23.01.2023 - 20:00
ÍtrótturAnnar ítróttur
Fyrimyndin 2022: - Eg fái orku frá teimum ungu
Jógvan K. Glerfoss hevur síðstu 15 árini lagt alla orku í bæði breiddar- og úrvalsíðkarar í Bragdinum. - Tað eru tey ungu, sum áttu at fingið heiðurin, sigur Jógvan sjálvur

Hetta kvøldið er venjingin á Tórsbreyt órógvað av kava.

Tað er ikki óvanligt - minni enn so - og ungu íðkararnir í Bragdinum lata seg heldur ikki forða. 

Tað sleppa teir heldur ikki, tá venjarin eitur Jógvan Kristiansson Glerfoss.

 - Hann er ikki beinleiðis strangur, men hann er øgiliga avgjørdur, tá tað kemur til venjing, sigur Arina Ludvig beinrakið.

 - Tú skalt fylgja væl við, og tú skalt gera tað, sum verður sagt.


Orkan kemur frá teimum ungu

Jógvan Kristiansson Glerfoss byrjaði at íðka frælsan ítrótt í Keypmannahavn tíðliga í nítiárunum, og nakað seinni - eftir aldarskiftið, tá Tórsbreyt var liðug -  tók hann eisini venjaralutin á seg, tá Niels Jákup Jakobsen ringdi.

 - Ein av mínum fyrimyndum í frælsum ítrótti ringdi og spurdi, um eg ikki kundi traðka til sum venjari í Bragdinum, og vit høvdu smá børn tá, men eg smekkaði til, fortelur Jógvan.

Tey, sum kenna Jógvan, siga, at hann er nærlagdur, nørdutur og tekur venjaragerningin í fullum álvara. Tað krevur bæði orku og tíð, men tær vanta ikki, sigur venjarin.

 -  Eg fái orku frá teimum ungu, og tað er so ótrúliga stuttligt at møta upp. Tað eru tey, sum áttu at fingið hesa fyrimyndina, sigur Jógvan.


Eiga lívið í ungdómsvenjingini

Rennibreytin er undir í kava, og tí verður leiðin sett oman á Tórsvøll, har til ber at venja undir taki á eystaru langsíðuni. 

Umstøðurnar eru ivasamar, men tað tykist ikki nerva ungu íðkararnar, sum fyrireika seg til stóra kapping í Reykjavík. Uttan Jógvan og makkaran, Debes Christiansen, var eingin ungdómsvenjing í Bragdinum yvirhøvur, er forkvinnan í Bragdinum ivaleys um.

 - Tí teir leggja sína sál í venjingina, sigur Ann Thomsen.

 - Teir taka sær av børnunum, teir taka sær av venjingunum og øllum rundanum. Viðhvørt hugsi eg, um hann ikki heldur seg eiga øll hesi børnini, so góður er hann við tey.

Hann eigur onkran av íðkarunum, gamaní, men ikki allar. Hini foreldrini eru eisini glað fyri arbeiðið, sum Jógvan ger.
 
 - Er tað okkurt; skaðar, sjúka ella eitthvørt annað, ger hann fegin eina venjingarætlan til hvønn einstakan, sigur Sanna Mouritsen.


 - Einastandandi engageraður

Frælsur ítróttur er einstaklingaítróttur við fleiri sergreinum - til dømis renning, lopi og kasti -  sum allar krevja nógv av íðkarum og ikki minst venjarum. Tað ræðir ikki Jógvan, heldur hinvegin.

 - Tað er nokkso nógv nørdarí rundan um tær sergreinarnar, sum eru. Tað drívur meg - eisini á tí teoretiska økinum. Tað er kanska serliga galdandi fyri úrvalsíðkararnar hjá okkum, har eg sleppi at hjálpa teimum at røkka málunum. Tað er ótrúliga spennandi, greiðir Jógvan frá.

 - Hann er einastandandi engageraður í tí, sum hann ger, sigur Debes Christiansen, sum man vera ein av teimum, sum kennir Jógvan best. Teir báðir hava verið vinmenn í ein mansaldur og býta venjaralutin í Bragdinum ímillum sín.

 - Tað er við 100 og ofta 200 prosent, at hann leggur seg í, tá venjingar skulu skipast, tá kappingar skulu skipast. Ikki bara fyri Bragdið, men eisini fyri íðkarar úr øðrum feløgum, sum hava tørv á hjálp.


Gull verdur

Ein av teimum, sum hevur tikið seg serliga nógv fram í frælsum ítrótti síðstu árini, er Jónas Isaksen. Í fjør tók hann fleiri met - millum annað í 400 metra renning og í longdarlopi - og tað er millum annað venjaranum fyri at takka. 

 - Hann (Jógvan, red.) er ein fantomvenjari, ein av teimum bestu í Føroyum og Danmark. Hann hevur sjálvur íðkað frælsan ítrótt, so hann veit, hvat skal til, sigur Jónas Isaksen.

 - Og hann er harður, tá tað kemur til venjingina. Hann letur teg ikki sleppa lætt, leggur hann smílandi afturat.

Røkkur tú ikki úrvalsstigi, fært tú kortini eina rúgvu burturúr at venja undir Jógvani, heldur Ann Thomsen.

 - Hann fær tey at trúgva upp á seg sjálvi. Hetta eru fólk, sum ofra alt fyri felagið. Tey eru góð við felagið, tey eru góð við íðkararnar, tey eru gull verd.

 Jógvan Kristiansson Glerfoss er í uppskoti til heiðurin ítróttafyrimyndin 2022, sum Ítróttasamband Føroya letur á árliga ítróttafagnaðinum 4. februar.

 
Er kopiera

Tak niður

Nýggjastu sendingar í ÚV
Sunnudag 29. januar
Meg Minnist - Karin Brattaberg (2:4)
151082
Sunnudag 29. januar
Bolero
151635
Sunnudag 29. januar
Guðstænasta í Glyvra kirkju
151633
Sunnudag 29. januar
Credo :"Pápi var dupultagentur".
151552
Nýggjastu sendingar í SV
Sunnudag 29. januar
Andakt við Peter Fleetwood
151642
Sunnudag 29. januar
Guðstænasta úr Glyvra kirkju
151640
Hósdag 26. januar
Foytar greyðir 1
151528
Týsdag 24. januar
Vísindavøka 2022
151430