- Tíðindi, mentan og ítróttur
VIDEO & MYNDIR: Sorgblíður síðsti túrur hjá Jónleifi
VIDEO & MYNDIR: Sorgblíður síðsti túrur hjá Jónleifi
Jónleif Láberg hevur ført Teistin síðani skipið kom í SSL-flotan í 2001. Og nú Sandoyarleiðin var niðurløgd, valdi Jónleif eisini at takka fyri seg sum skipari
21.12.2023 - 16:46
Tað var ein sorgblíð løta hjá Jónleifi Láberg, skipara, tá hann førdi Teistan fyri seinastu ferð úr Skopun á Gomlu rætt.
Teistin hevur verið arbeiðsplássið hjá Jónleifi síðani skipið kom í flotan fyri útvið 23 árum síðani.
Sorgblítt var tað eisini hjá sandoyingum, ið hava havt Teistan sum álitið og einasta sambandi við meginøkið.
Tískil nýttu nógv fólk í dag eisini høvið í dag til at siga bæði Teistanum og Sandoyarleiðini farvæl.
Dagurin var eisini serligur fyri manningin umborð á Teistanum,, ið bæði eru vorðnir góðir við Teistan, men eisini tey mongu fólkini, ið hava siglt við Teistanum.
Tískil passaði tað Jónleif Láberg væl, at hann kundi takka fyri seg sum skipari í Strandfaraskipum Landsins og fara á eftirløn, tá Sandoyarleiðin bleiv niðurløgd.
Jónleif Láberg, skipari, ið er búsitandi í Skopun, fyllur 72 ár næstuferð.
Skopun er løgd afturum fyri seinastu ferð og kósin er sett móti Gomlurætt.
Magnus Olsen, ið eisini hevur verið skipari umborð á Teistanum, heldur fram í Strandfaraskipum Landsins.
Magnus er stórur fortalari fyri, at Teistin ikki verður seldur, tí skipið er sera gott, heldur hann.
Áhugin fyri seinastu túrunum hjá Teistanum um Skopunarfjørð var stórur.
Í dag rann saman millum ta nýggju og gomlu tíðina hjá sandoyingum.
Teistin eigur eitt serligt pláss í hjørtunum hjá serliga sandoyingum, men sanniliga eisini hjá manningini.
Gunnar Olsen, ið hevur verið hovmeistari umborð á Teistanum í nøkur ár, er úr Hvalba. Hann hevur trivist væl umborð, og fer at sakna bæði manning og fólk, ið hann er komin at kenna tíðina umborð á Teistanum.
Ein síðsti kaffimunnur í messuni.
Er kopiera
Nýggjastu sendingar í ÚV
Nýggjastu sendingar í SV
