- Orð eru fátøk. Takk er ikki nóg mikið

Teis Horn Rasmussen iðraði seg um, at føroyska hondbóltslandsliðið ikki skal spæla fleiri EM-dystir á hesum sinni.

Tí upplivingin og stuðulin, sum føroyska áskoðarafjøldin gav spælarunum í Mercedes Benz-Arena, var serstakliga góð aftur hesa ferð, eins og hon hevur verið ígjøgnum allar bólkadystirnar.

 - Tað er sjúkligt, at tey blíva við og blíva við. Orð eru fátøk. Takk er ikki nóg mikið. Tað er púra vilt, segði Teis Horn Rasmussen, sum iðraði seg um tepra tapið fyri Póllandi.

Tað var serliga í verjupartinum, at Føroyar vóru ov stuttar, sambært strikuspælaranum.

 - Tað gongur fyri sovítt fínt, men teir hava ein strikuspælara, sum vit ikki fáa tak á. Vit fáa ikki loyst hava uppgávuna. Har er fysikkur á muni, segði Teis Horn Rasmussen um 127 kilo tunga Kamil Syprzak úr PSG, sum skeyt níggju mál og vann okkurt brotskast eisini.