Besta føroyska úrslitið í amboðsfimleiki higartil

Aron D. Jacobsen vann um vikuskiftið gull í beinsveiggi í norðurlanda meistarakappingini í Oslo. Sambært fimleikasambandinum er hetta besta úrslitið, sum nakar føroyskur amboðsfimleikari hevur fingið til altjóða kapping. 

Í innleiðandi kappingini fekk Aron Jacobsen 13.600 stig, og vann sær pláss í finaluni sum hin fremsti.

Úrslitið í finaluni var hitt sama. Føroyski íðkarin, sum síðsta árið hevur lagt seg serliga eftir beinsveiggi og lagt hinar greinirnar til síðis, vann við sama stigatali frammanfyri Marcus Pietarinen úr Finlandi og David Rumbutis úr Svørríki, sum báðir fingu 13.533.

Hetta var seinasta kappingin hjá Aroni D. Jacobsen fyri summarsteðgin. Seinni í ár skal hann kappast um norðurevropeisku meistaraheitini.