Óli Mittún til GOG: Familja og trivnaður í hásæti

Fleiri av størstu feløgunum í Evropa hava verið eftir føroyska hondbóltsúrmælinginum, Óla Mittún.

Hóast óvanliga kviki bakspælarin úr Hoyvík ivaleyst kundi farið beinleiðis til Týsklands, hevur hann valt at taka eitt 'minni' fet áðrenn hann leggur leiðina til eitt av risafeløgunum í Evropa.

Hann hevur valt GOG á Fjóni við trivnaði og familju fremst í huga.

 - Uttanfyri vøllin fari eg at búgva saman við nógvum ungum, og so eisini ein tíma frá Keypmannahavn, har eg havi nógva familju og vinir, sigur Óli Mittún, sum biður farvæl í IK Sävehof, tá hetta kappingarárið er lokið.

Eitt stig á leiðini

GOG er kortini ikki nakað lítið felag. Í løtuni er liðið av Fjóni á odda í bestu donsku deildini frammanfyri Aalborg, sum hevur fleiri stórspælarar á liðnum.

19 ára gamli Óli Mittún dylir heldur ikki fyri, at hann ætlar sær longur út í heim seinni.

 - GOG er eitt fantastiskt felag, men dreymurin er sjálvandi at koma til enn størri feløg. Beint nú eri eg kortini sera fegin um at skula spæla fyri GOG, og um teir klára seg øgiliga væl í ár, skulu vit kanska spæla Champions League, sigur Óli Mittún.

Keypið av hondbóltssnillinginum var kunngjørt undan toppbrakinum millum GOG og Aalborg, sum nýggja felagið hjá Óla Mittún vann sannførandi.

Hørð kapping um plássini

Óli Mittún telist millum heimsins fremstu hondbóltsspælarar í sínum árgangi - tað er allir serfrøðingar samdir um - men hann fær harða kapping um plássini, tá hann skal spæla í gulum og reyðum næsta ár. 

Hann skal millum annað kappast við 23 ára gamla norska spælskiparan, Tobias Grøndahl, eitt av heitastu hondbóltsnøvnunum í løtuni.

 - Mín leiklutur er sjálvandi sum spælskipari, so fara at skiftast eitt sindur. Tað kemur sjálvandi ann upp á, hvør spælir betri til ta tíð, men eg vænti, at vit fara at spæla eitt sindur saman eisini. Eg á vinstra bakki ella hann á vinstra bakki, greiðir Óli Mittún frá.