Spellerberg í føroyskari blusu: Tað verður sera torført ímóti Danmark

Fyrrverandi spælarin á danska manslandsliðnum í hondbólti, Bo Spellerberg, fylgdi spentur við, tá Føroyar tryggjaðu sær javnleik ímóti Kroatia sunnudagin.

Tað gjørdi hann í føroyskari landsliðsblusu, sum hann hevur fingið frá Pernille Brandenborg. Hann er nevniliga venjari í København Håndbold, har liðskiparin hjá Føroyum spælir.

 - Hetta var ein av teimum mest spennandi og intensu dystunum, sum eg havi sæð. Góðskan var eitt sindur misjøvn, men tað var stuttligt at hyggja, segði Bo Spellerberg beint eftir dystin.

Hann rósti føroyska liðnum, men væntar kortini, at tað verður torført hjá Føroyum at gera nakað við Danmark.

 - Føroyar fáa nógv at gera. Eg vóni, at málverjaavrikið verður gott aftur, og at Danmark ger nakrar tekniskar villur, tí annars kann tað gerast sera torført hjá føroyingunum, sigur Bo Spellerberg.