VIDEO: Kom við ein biltúr gjøgnum nýggju tunlarnar norður um Fjall

Hósdagin verður tilveran hjá fólki norðanfyri, í bygdunum Árnafirði, Norðtoftum, Depli, Norðdepli, Hvannasundi og Viðareiði, kollvelt. 

Tá lata nýggju tunlarnir norður um Fjall upp fyri almennari ferðslu. 

Byggingin av tunlunum hevur verið eitt stórt tak, ásannar Karl Vang, byggi- og verkætlanarleiðari hjá Landsverki. 

"Hetta er eitt stórt prosjekt. Tað er langt. Tað er útvið seks kilometrar langt, og tað hevur gingið nógv fyri seg," greiðir Karl Vang frá, meðan hann koyrir ein biltúr gjøgnum nýggju tunlarnar saman við Bárði Lydersen, ið hevur filmað og klipt. 

"Hetta fer at hava øgiliga stóran týdning fyri fólk norðanfyri. Nú fer at bera til at taka bátar upp við einum stórum kranabili, og tað hevur slett ikki borið til fyrr."